Աղջկաս Մարիամ կանվանակոչեք. Մարիամաձորում զոհված հերոսի պատգամը

Գեղարքունիքի Կարմիրգյուղ համայնքի 44 օրյա պատերազմի միակ զոհը, 31-ամյա  կամավորական  Գարիկ Գափոյանն է, ով զոհվել է Մարիամաձորում /Չռիկում/: Հերոսի մայրը, համայնքի գրադարանավարուհի՝ Սուսաննա Նավոյանը  պատմեց, որ որդին հոկտեմբերի 15-ին ծանուցվել է ռազմաճակատ մեկնելու համար:
-Դու չգնաս, ես չգնամ, ո՞վ գնա, մեջքիս վրա  ո՞նց հանգիստ պառկեմ, պարտք ունեմ տալու երկրիս,- ասել է Գարիկն ու տանը թողնելով 4 տարեկան որդուն՝ Գոռին, հղի կնոջն ու ծնողներին մեկնել Արցախ:

Տես՝ տեսանյութը:
Կնոջ՝ Արփինե Տեր-Աբրահամայնի խոսքերով.  
- 3 օր անց, 18-ի կեսգիշերին, սրտիս արագ, անսովոր  հարված ստացա ու վեր թռա անկողնում: Վատ կանխազգացում ունեի, գնացի հարևան սենյակ, որտեղ սրբապատկեր ունեինք, մոմ վառեցի Գարիկի համար, հանգստացա, եկա պառկեցի ու քնեցի: Երազումս Գարիկը եկավ, փոքրացած էր, հարցրեցի, թե Գարիկ,  ինչու՞  եկար այսքան շուտ:
-Արփ, որ 1 հոգին 8 հոգու տեղ կռվի, կլինի՞,-պատասխանեց Գարիկը:
Առավոտ վաղ, հրամանատար՝ Վահրամ անունով մեկը, զանգահարեց և ասաց, որ հպարտանանք Գարիկով, նա այսուհետ նահատակված հերոս է:
Որդիս՝ 4 ամյա Գոռը դեռևս չգիտի հոր մահվան մասին ու սպասում է դեռ ու անվերջ հարցնում.
-Բա պապան, ինչի՞  չի գալիս:
Ապրիլին կծնվի մեր աղջիկը՝ Մարիամը, որին արդեն անվանակոչել է Գարիկը, ու նախախնամությամբ զոհվել հենց  Մարիամաձորում,-արցունքները կուլ տալով պատմում էր հղի կինը:
Նարինե Հասրաթյան