Կամբատն ասաց, հողերը հանձնել են, իջե՛ք դիրքերից, հոգեխանգարմունքի մեջ ընկանք. Վրեժ Բաբայան

-Անհանգստանում եմ  հրամանատարիս  առողջության համար, նա բոլորիցս ծանր է տանում  ստորագրված ստորացուցիչ կապիտուլացիան, որը նվաստացրեց , խեղեց ու ուժասպառ արեց մեր հերոսական ազգին,-ասում է Արմավիրի մարզի, Ամբերդ համայնքի բնակիր՝ Գ. Խուրշուդյանը:
Խոսքը մայոր, վաշտի հրամանատար,ամբերդցի, 65- ամյա՝ Վրեժ Բաբայանի մասին է, ով հանրությանը հայտնի է, որպես  Էջմիածնի ջոկատի հրամանատար, ով 3 պատերազմի է մասնակցել: Հիշեցնենք, որ նրա  ջոկատում են կռվել հանրահայտ՝ Մանվել Գրիգորյանը, Սեյրան Սարոյանը, Գագիկ Մելքոնյանն ու այլք:

Վրեժ Բաբայանի ջոկատն այս անգամ համալրված է եղել մարզի 7 համայնքապետերի՝ Դողսի, Զևայի, Ապագայի, Ջրառատի, Արագածի, Լուսագյուղի և Խաթունախի  աշխարհազորայիններով:
-Նահանջի հրահանգ առաջին անգամ լսեցի,-մտահոգ պատմում է Վրեժ Բաբայանը,- Ինքնամոռաց, վասն հայրենյաց կռվում էինք վաշտի տղերքով՝  թուրքական գերժամանակակից զենքեր դեմ: Անտրտունջ  կռիվ էր՝ հանուն հայրենիքի: Երկինք ու գետին պատված էր կրակներով ու պայթյուններով: Երկնքից թափվող գրադների հեղեղ էր:
Անսովոր պատերազմ էր: Տպավորություն էր, որ ոչ-ոք  չի կարող փրկվել ու ողջ դուրս գալ այս կրակներից: Երբ կամբատն ասաց՝ հողերը հանձնել են իջե՛ք դիրքերից, հոգեխանգարմունքի մեջ ընկանք…ո՞նց… ի՞նչի համար: Ախր մենք կարող էինք պահպանել մեր հողերը: Տղերքն անձնուրաց, առյուծաբար, կենաց մահու կռիվ էին տալիս:Ախր, էս նոր սերնդի՝ 18-19 տարեկան  պատանիների հերոսական դրվագներից, արյունդ երակներումդ սառում է: Մենք հաղթանակներ կերտած ազգ ենք, ի՞նչ կապիտուլացի…ի՞նչ պարտություն, ի՞նչ նահանջ…:
Փաստորեն բանակը չէր համալրվում: Մտածված տարան պարտության: Դավաճանությունն արեց իր սև գործը ու հիմա էսպես գլխիկոր ո՞նց ապրենք:
 Երանի մեռածներին, որ չտեսան այս խայտառակությունը,- ավարտեց խոսքը Վրեժ Բաբայանը:

Նարինե Հասրաթյան