Թուրքական լիրան հոգեվարքի մեջ է

ԱՄՆ դոլարի նկատմամբ թուրքական լիրայի փոխարժեքի կտրուկ անկումը շարունակվում է՝ հոկտեմբերի 26-ի առավոտյան արձանագրելով նոր պատմական նվազագույն ցուցանիշ՝ 8,0006 լիրա մեկ դոլարի դիմաց, ինչը կրիտիկական հոգեբանական շեմ է։ Ընդ որում, ըստ Bloomberg-ի, լիրայի փոխարժեքի անկման այս 9-ամսյա շրջափուլն ամենաերկարատևն է 1999-ից ի վեր։
Փորձագետները լիրայի արժեզրկման պատճառների թվում նշում են ցածր իրական տոկոսադրույքները և Թուրքիայի տնտեսության նկատմամբ ներդրողների հետաքրքրության նվազումը՝ ԱՄՆ-ի կողմից պատժամիջոցների կիրառման ռիսկի, Միջերկրական ծովի արևելքում և Ղարաբաղյան հակամարտության գոտում Անկարայի անկանխատեսելի վարքագծի ֆոնին։ Հետաքրքրության նվազման մասին է վկայում այն հանգամանքը, որ 2020-ի հունվար-հոկտեմբերին օտարերկրյա ներդրողները վաճառել են 13,3 մլրդ ԱՄՆ դոլարի թուրքական բաժնետոմսեր և պարտատոմսեր, ինչն առավելագույն ցուցանիշն է 2005-ից ի վեր։ Դա այն դեպքում, երբ Թուրքիան արդեն ծախսել է արժութային պահուստները։