Գյուղացին քաղաքացուց երեք անգամ էժան է

Արմավիրի մարզի, Էջմիածնի տարածաշրջանում գործող «Արաքս» թռչնաֆաբրիկայի մի քանի աշխատակիցներ դիմել են մեր կայքին՝ տեղեկացնելով, որ իրենց աշխատանքի դիմաց ցածր են վարձատրվում, քանի որ իրեն գյուղի աշխատուժ են համարվում: Քաղաքացիների բողոքն առանց խմբագրման ներկայացնում ենք ստորեւ.

«Մենակ, որպես աշխատատեղ  «Արաքս» թռչնաֆաբրիկան է մեր գյուղերին մոտիկ գործում, էն էլ Էջմիածին եւ Երեւան քաղաքներից մի քանի ավտոբուս աշխատող են բերում, գյուղերի աշխատողները էդքան շատ չեն։ Քաղաքի աշխատողներին ավտոբուսները համ ձրի են տանում-բերում, հետն էլ բարձր աշխատավարձ են տալիս քան գյուղերում ապրող աշխատողներին։ Տնօրինությունը էդպես է կամենում, մասնավորինն ա, ինչքան կամենա էդքան էլ կվճարի, աշխատողներն ի՞նչ անեն, թեկուզ ցածր աշխատավարձով ստիպված հարմարվել են աշխատում են։ Էս մի գործարանն ա տարածքում, էլի հույս ա, գնում գալիս ենք։ Պետության հիմնարկություն պետք է լինի, որ հաշվի չառնեն գյուղ ու քաղաք, վարձատրությունն էլ լինի բանվորի տանջանքին հավասարազոր: Ուզել ենք ֆաբրիկայի տնօրենի հետ զրուցել, բայց չեն ուզել անգամ մեզ հանդիպել»:

Որքանո՞վ է արդարացի բնակիչների բողոքը, փորձեցինք պարզել ընկերության վարչակազմից, սակայն նրանք հրաժարվեցին պատասխանել հարցերին, ասելով՝ «Դուք գրեք, մենք կկարդանք»: Հուսանք, որ ընկերությունում բնակիչների բողոքը կարդալուց հետո հավասար մոտեցում կցուցաբերեն եւ աշխատակիցներին կվարձատրեն ոչ թե ըստ բնակության վայրի, այլ՝ կատարած աշխատանքի:

Հերմինե Մանուկյան