Բնության մեծագույն հրաշքի՝ երկունքի և ծնունդի կես դարյա ականատեսը

Արարատի մարզի մեր ընթերցողները տեղեկացնում են, որ սույն թվականի հունիսի 29-ին լրացավ Արտաշատի ԲԿ-ի գինեկոլոգիայի բաժանմունքի նախկին ղեկավար, բժշկուհի Զեմֆիրա Նավասարդյանի աշխատանքային գործունեության 50-ամյակը:

Հմուտ բժշկուհին շնորհավորանքների ու մեծարման հեղեղատում է եղել այդ օրը:

Գինեկոլոգ Զեմֆիրա Նավասարդյանը չնայած 75 տարեկան է, սակայն Արտաշատի ԲԿ-ի ղեկավարությունը, դեռևս  ամուր պահում է պրոֆեսիոնալ կադրին, ով միայնակ կառավարում է ծննդի ողջ գործընթացը մինչև մանկան լույս աշխարհ գալը: Բժշկուհու գործընկերներն էլ պատմում էին, որ գինեկոլոգ, արհեստավարժ բժշկուհու գիտելիքներն ու փորձառությունը գերազանցում է անգամ բժշկական մուլյաժին, որով ԲԿ-ում վերակենդանացնում են նորածնին:
-Զեմֆիրան իր կենսափորձով մի ամբողջ նյութատեխնիկական բազա է առողջապահական ոլորտը ճիշտ կազմակերպելու համար,-պատմում է Արտաշատի ԲԿ-ի գինեկոլոգիայի բաժանմունքի վարիչ՝ Արման Սահակյանը,- Անուրանալի է ծննդկանների համար նրա լուսաբանող խորհրդատվությունները: Իրեն դիմող հղիին համբերատար, բացատրում է ամբողջ գործընթացը, իսկ վերջինս էլ պատկերացնում է այն ահռելի աշխատանքը, որը կատարվում է իր համար:
75-ամյա գինեկոլոգիայի նահապետը, կես դար միմիայն հրաշքին ականատես լինելու զգացողություններ ունի: Նա ականատեսն է բնության այդ մեծագույն հրաշքի՝ երկունքի ու ծնունդի:
Ինչպե՞ս է մարդը ստեղծվում, լույս աշխարհ գալիս, հասակ առնում,սովորում խոսել և դառնում յուրահատուկ, որովհետև ոչ մեկը մյուսի նման չէ: Սրանից առավել մեծ հրաշք ոչ ոք չի տեսնում: Էությամբ փափկասիրտ, հոգատար, հուզվող, կարեկցող, մասնագիտությունն իր դերն է ունեցել Զեմֆիրա Նավասարդյանի այս հատկությունների կերտման գործում:

Մանուկները միայն լուսավոր, դրական հույզեր են առաջացնում և բարությամբ լցնում նրանց միջավայրը:
 Բժշկուհին համեստորեն խուսանավեց մեր հարցադրումներից:
Իսկ ի՞նչ  են մտածում ՀՀ իշխանությունները, կառավարությունը:  Խուլ ու համրի դերից  դուրս եկեք ու նկատե՛ք, մեծարե՛ք ազգի նվիրյալներին:Հետո չասեք վա՜խ, կորցրեցի՛նք: